Ballið er rétt að byrja

Já Glitnir hirti fyrst allt fémætt út úr fyrirtækinu, eða þá þætti sem hugsanlega gætu skilað hagnaði og hitt látið vera. Auðvitað vita allir að öðrum þáttum væri stefnt í gjaldþrot, til þess var ætlast og líklegra en ekki að þetta hafi átt sér talsverðan aðdraganda og skipulagsvinna verið í gangi nokkurn tíma.

Við eru rétt að byrja að sjá fyrstu fyrirtækin standa tæpt. Veturinn verður stórviðrasamur í þessum efnum. Bankarnir eiga eftir að leysa til sín eignir upp á milljarði næsta árið - Það er mín spá. Það hlýtur að vera æðislegt að vita bankann sinn styrkja íþróttahreyfinguna gegn auglýsingu á t.d. fótboltavellinum og barnið eða unglinginn vera að spila við hlið auglýsingarskiltis frá banka sem á sama tíma tekur vinnuna af heimilisföðurnum og hirðir svo örugglega húsið hans að lokum. Auðvitað ekki bankanum að kenna Bankanum sem bauð fjölskyldunni gull og græna skóga fyrir nokkrum mánuðum- En Lífið er enginn leikur það kemur örugglega í betur í ljós á haustmánuðum.

Hvenær verða kosningar næst?

Starfsmenn fá ekki greidd full laun

Einkavæðing í heilbrigðisgeiranum?

Til eru þeir furðufuglar sem telja að ríkið eigi helst ekki að vera að vasast í nokkrum hlut nema að setja lög eða ólög. Allt skuli einkavætt og skiptir engu hvað það sé. Hér er lítil og skemmtileg saga frá hvernig einkavæðingin kemur út, en um leið sorglegt dæmi um það og manni verður slóst að ekki blómgast allt í garði einkavæðingar.

Móðir mín er orðinn talverður sjúklingur en hefur getað búið heima með aðstoð. Eru þar fyrst og fremst lungu sem eru orðin léleg og af þeim sökum þarf hún að búa við það að bera öndunarkút á daginn og sofa með öndunargrímu á næturnar. Hún fær m.a. heimsókn hjúkrunarfræðings og almenna heimilishjálp nokkur skipti í viku. Þegar hjúkrunarfræðingnum datt það snjallræði í hug fyrir skömmu að sækna um hvíldarinnlög fyrir hana á gömlu heilsuverndarstöðinni í c.a. 2 vikur tóku allir nálægir móður minnar vel í það. Þarna er einkarekin bæði dagvistun og 24 stunda skammtíma vistun. Svarið var afdráttarlaust NEI. Þeir gætu ekki tekið móði mína inn í 1-2 vikur og ástæðan var nefnd: Of dýr sjúklingur vegna öndunartækja. Jafnvel þó svo móðir mín kæmi með sín eigin tæki sem eru ekki fyrirferðamikil. NEI rafmagn fyrir t.d. næturvél væri bara of peningafrek. m.ö. þarna virðist eitthvert takmark á hve miklu hver sjúklingur má eyða af rafmagni. m.ö.o. þarna er kostnaður haldið í lámarki og sjúklingum með einhver aukakostnað annan en það að vera manneskja sem andar og nærast er vísað frá því slíkt kemur hugsanlega niður á áætluðum hagnaði þeirra sem reka batteríið.

Þetta segir mér að þegar búið verður að einkavæða heilbrigðiskerfið þá koma ættingjar til með að sitja uppi með alla þá sjúklinga sem einhver aukakostnaður fylgir, burt séð frá því hvort það er í formi rafmagns eða einhvers annars. Það er því ýmislegt sem þarf að athuga áður en við látum HERRA KAPÍTAL taka við rekstri heilbrigðiskerfisins.

 

Sandkassaleikur þjóðarinnar

Svo virðist sem stór hluti þjóðarinnar sé kominn í einhverskonar sandkassaslag vegna ummæla Bubba í viðtali við Moggann. Og dagblöð þjóðarinnar taka þátt í leiknum af fullum þunga.
Fyrir mér er þetta svona

- Bubbi er betri en Björk
- Björk er betri en Bubbi
- Bubbi má alveg segja það sem hann vill
- Bubbi má ekki segja það sem hann vill
- Bubbi dissar Björk
- Bubbi var ekkert að dissa Björk

Fyrir mér er hinsvegar útgangspunktarnir skýrir og ég held bæði með Björk og Bubba því ég er bæði á móti virkjanaframkvæmum í þeirri mynd sem þær eru framkvæmdar og fátækt í þeirri mynd sem þær eru að birtast okkur.

PLÍS komið upp úr sandkössunum og ræðið málefnin sem skipta okkur sem þjóðfélag meira máli en Bubbi og Björk. Leitum leiða að lausn þeirra. Ég er þess nánast fullviss að hvorki Bubbi né Björk hafa neitt með það að gera. Hvorug eru blönk og bæði nota þau rafmagn frá einhverri virkjun auk þess að vera bæði ágætir tónlistarmenn. Alvarlegra finnst mér að:

Í vændum eru 200 uppsagnir hjá SPRON samkvæmt frétt Moggans. Við erum byrjuð að sjá afleiðingar fjármálasukksins nú og hverjir blæða... Líklega saklausir millistjórnendur SPRON, Nokkrir tugir byggingarverkamanna. Bankarnir farnir að yfirtaka fyrirtæki eins og nú var að gerast með MEST og örugglega einhverjir tugir starfsmanna þar á leið á atvinnuleysisbætur. Kröfur minni verktaka tapast í gjaldþrotum sem verða að segja upp fólki vegna fjáskorts og auraleysis

Æji, nei, nei. Okkur kemur þetta kannski bara ekkert við - Eigum við ekki bara að halda áfram í sandkassaleiknum - Hann er svo mikið skemmtilegri - Bubbi er.... eða var það Björk er.....?

Kreppa væntanleg

Þetta ár hefur einkennst af krepputali. Menn hafa að vísu mest rætt um fjármálakreppu. Í mínum huga eru það fjármálamennirnir sem upplifa þá kreppu fyrstir manna. Við hin höfum því haft ákveðin aðlögunartíma. Hinsvegar mun þessi kreppa skila sér til okkar með auknu atvinnuleysi og þrengingum innan tíðar eins og þegar er farið að örla á.

"Þetta hófst allt með kreppu á fjármálamarkaði í ársbyrjun 2008" svona munu yfirskriftir og skýringar sagnfræðinga líklega líta út í nánustu framtíð þegar farið verður að skrifa um þetta tímabil.

Fjármálakreppa! Hún kemur þorra almennings í lægri millistéttum bara lítið við allavega ekki enn nema að því leiti að lán fólks hækka. En það tók þátt í fjármálafylleríi banka og fjármálastofnana á sínum tíma með lántökum og spennti boga sinn meira en strengir hans þoldu til lengri tíma litið og kenna nú bankanum um, Auðvitað er það bankanum að kenna að "þú" tókst lán. Svo eru þeir sem í besta falli mæta bara í bankann sinn og eyða mánaðarlaununum í að greiða reikningana sína. Ráða við það þó einhverjir 1000 kallar bætist við.

Með öðrum orðum - Fjármálakreppan kemur mest niður á þeim sem stöðugt eru í leit að lánsfjármagni. Þá helst bönkum sem í órásíunni slógu skammtímalán og lánuðu í lengri tíma. (gáfulegt eða hitt þó heldur).

Sú staðreynd er okkur ljós að hin eiginlega kreppa mun líklega ríða yfir í kjölfarið. Þegar bankar hætta að leyfa minni og miðlungsfyrirtækjum að framlengja lán nema með himinháum vöxtum. Hún mun líka birtast okkur þegar verktakar fara að rúlla á hausinn og margföldunaráhrifin gera vart við sig. Því þau greiða ekki undirverktökum sínum eða öðrum sem unnið hafa fyrir þau. Reikningar fyrir aðföng þessara fyrirtækja hrúgast upp hjá lögfræðingum og innheimtustofnunum og vegna þess munu fyrirtækin segja upp fólki í meira mæli en við höfum séð.

Þetta er ekkert nýtt á Íslandi. 10 ára sveifla. Skoðið söguna. 1988, 1998 og nú 2008. Það sem fer upp hlýtur að koma niður. Ég hef t.d. brugðist þannig við að í hvert sinn sem ég geng að einhverju í hillu verslunar og tek það mér í hönd spyr ég mig í leiðinni. Hve mikil er þörf mín á þessum hlut. Ég lifði í gær án hans! gæti ég lifað í dag án hans? Held að nú sé tími til að draga niður stórseglin, finna lygna sendna vík og bíða af sér vinda fjármálakreppu. Ég er þess fullviss að DVD myndin sem ég ætlaði að kaupa í gær verður líka til sölu þegar ég get leyft mér að eyða í hana peningum.

Naglinn hittur á höfuðið

Tek ofan hatt minn fyrir Bubba hér. Já, já ekki í fyrsta sinn. Aftur á móti fyllist ég meðaumkvun með nokkrum bloggurum hér á mbl.is sem dæma Bubba fyrir ummæli sín og kasta fram einhverju á borð við af hverju Bubbi syngi ekki gegn fátækt. Held að sumir í bloggheimum ættu að reyna að komast út fyrir eigin hrokaköst og jafnvel skoða sögu Bubba Morthens áður en þeir tala um að Bubbi hefi ekki tekið á þessu málefni eins og svo mörgum öðrum. Já það er fátt huggulegra í morgunsárið en sitja við tölvuna sína og rakka niður manninn sem ber skilaboðin og vekur athygli á málefninu. Hvernig væri að menn tjáðu sig um málefnið í stað þess að lýsa skoðun sinni á viðmælandanum. Hvort þeim líkar við Bubba Morthens eða ekki kemur bara fátækt á Íslandi ekkert við. Þessi aðferðarfræði okkar Íslendinga þegar eitthvað fer úrskeiðis er með eindæmum. Við gerumst svo upptekin við að finna sökudólginn að við gleymum að lagfæra það sem úrskeiðis fór. Mæli með að við ræðum frekar um málefnið í kjölfar þessa viðtals en Bubba Morthens.

Björk ætti frekar að syngja gegn fátækt

Kominn úr fríinu en ennþá latari

Leti er þessa dagana eins og pest sem neitar að yfirgefa mig. Rétt eins og hún hafi fundið sér framtíðarheimili. Ég er nú samt ekkert viss um að ég sé til í að vista hana til eilífðarnóns.  Ég svona drattast í vinnuna og drattast heim. Ég er meira að segja svo latur þessa dagana að ég nenni ekki einu sinni að liggja í leti. Í þessu sambandi dettur mér í hug bráðsmellin saga frá þeim tíma sem ég var að vinna á einni af geðdeildum landsins. Þar sem einn fastagesta deildarinnar hálflá í einum hægindastól seturstofunnar þegar hjúkrunarfræðingurinn kom til að gefa honum kvöldlyfin og sagði um leið Þú ætti nú bara að drífa þig í hátti XXX (svo við köllum viðkomandi sjúkling eitthvað.) XXX reis þá upp leit grimmum augum á hjúkrunarfræðingin og sagði hvellt Hey! ekki vera að reka á eftir mér í vinnunni kona. Ha í vinnunni? hváði hjúkrunarfræðingurinn. Já svaraði XXX um leið, Heldurðu að það sé ekki fullt starf að vera geðveikur.

Ástæðan að ég segi ykkur þessa sögu er svo þið skiljið að það getur líka verið fullt starf að vera latur (stundum). Og fyrst við erum að tala um leti sem starf þá er ég að hugsa um að vera bara í því í 50% vinnu hvað það varðar. Það er latur í c.a. fjóra tíma og þá get ég verið svolítið duglegur í c.a 8 tíma. Já nú vandast málið því sólahringurinn er bara hálfnaður. OK sef í tíu og tala við konuna í tvo. (grín, vona að hún sjái þetta ekki) En þið sem eruð að pæla í hvort þið eigið að nenna einhverju. Setið bara tímamörk á letina og klára svo málið.

Leti og farinn í frí í viku

Jæja. Déskollans leti í manni að nenna ekki að blogga svolítið. En kannski ekkert skrítið þegar maður er BARA í vinnunni enda ekkert þar að ske annað en vinna. Nú er aftur á móti komið sumar með blóm í haga og þá skrepp ég eins og aðrir landsmenn á næstu ferðaskrifstofu og kaupi miða til Spánar eða annarra álíka staða. Ég er sem sagt að fara á morgun í viku til Salou, c.a klukkustund. frá Eið Smára og félögum og aldrei að vita nema maður rekist á kallinn eða bara kíki til hans í kaffi. Enda hefur hann örugglega nógan tíma því það er ekki eins og hann sé að spila fótbolta á hverjum degi. (Og þó kannski verður hann eitthvað upptekinn við æfingar enda er mér sagt að hann sé ekki alveg nógu góður til að komast í byrjanaliðið.) En ef ekki þá fær maður sér bara öl einhverstaðar í rólegheitum.

Er bensínverðið hátt?

Við erum að missa okkur yfir verði á olíum og bensíni þessa dagana. Mér varð nú líka nokkuð brugðið þegar ég skrapp inn á ónefnda bensínstöð um daginn og keypti þar íslenskt vatn í smáflösku fyrir farþega sem ég var að aka. Smá flaska af þessum vökva kostaði litlar 102 krónur. Ég gat ekki orða bundist þegar ég rétti frúnni flöskuna að hún hefði komið betur út úr því fjárhagslega að kaupa sér lítir af bensíni. Kíkið á verð á gosdrykkjum á þessum stöðum og þá fattið þið að líklega er bensínlíterinn einhver ódýrasti vökvinn sem seldur er á bensínssölum landsins.

Ósanngjörn gagnrýni

Nú undanfarið hafa fréttastofur beint spjótum sínum miskunnarlaust að Borgarstjóranum vegna ráðningar Jakobs F. Magnússonar. Sagt laun hans ranglega um 800 þúsund en þegar málið er skoðað eru það heildargreiðslur fyrir margvísleg nefndarstörf.

Mér finnst að nú sé mál að linni. Gefum aumingja manninum vinnufrið. Manni sýnist fréttastofur landsins hamast í borgarstjóranum og bíða þess að geta neglt hann á einn eða annan hátt. Hver einasta embættisfærsla hans er gagnrýnd og lögð til verri vegar. Fólk gargar á að borgin taki miðbæinn í gegn þegar Borgarstjóri fær sér aðstoð við verkið, ræður til sín mann sem hingað til hefur verið þekktur fyrir að koma hlutum á hreyfingu og fá menn í hlutina tryllast allir yfir einhverjum krónum. Værum við betur sett með einhvern kerfiskall úr stjórnkerfinu á lúsalaunum og afköst eftir því? Ég hef mikla trú á Jakobi F. Magnússyni hvort það er til þessara verka eða annarra. Vissulega skynjar maður að Jakob selur sig ekki á 10 kall, ekkert okkar vill það.

Fyrir mér hefur nú verið ráðinn maður sem ég hef trú á að láti hendur standa fram úr ermum við að gera umhverfi okkar Reykvíkinga aðeins huggulegra en útkrotaða veggi og yfirgefin hús í niðurníðslu. Ég væri frekar til í að gagnrýna Franskar herþotur sem fljúga hraðar en hljóðið fyrir 100 millur í vikur. Held að þær breyti umhverfi mínu ekkert og þar erum við að tala um meira en ævilaun ræstingarkonunnar í Fellaskóla

Samskipti við trommara

Eitthvað virðist fyrrum trommuleikari Egósins ósáttur við Bubba Morthens og umboðsmann hans samkvæmt ummælum hans í DV í dag 7. maí. en á DV.is má m.a finna eftirfarandi:

„Mér dettur ekki í hug að fara að vinna með Bubba Morthens aftur, ég vinn ekki með einstaklingum sem notast ekki við heilbrigða samskiptahætti og heiðarlega,“ segir Magnús Stefánsson, fyrrverandi trommuleikari hljómsveitanna Egó og Utangarðsmanna. Magnús mun ekki taka þátt í sérstökum endurkomutónleikum hljómsveitarinnar Egó sem haldnir verða á skemmtistaðnum Nasa þann 17. maí. 

Reyndar eru málavexti hvergi raktir né ástæður nefndar að neinu viti í blaðinu, nema að Maggi segist ekki vinna með fólki sem ekki geti haft eðlileg samskipti. Það vekur óneytanlega upp þær spurningar hvað teljist eðlileg samskipti við trommara hljómsveita. Óneytanlega detta manni í hug orð Ozzy Osborn "Hey! þú ert bara andskotans trommari og hefur bara eitt hlutverk hér - TROMMAÐU!"