Íslendingar

Það eru kannski ekki margir sem vita að ég á bræður. Sá elsti hefur verið búsettur í Bandaríkjunum síðustu áratugina. Lengi vel í N.Y. og síðar í Tampa á Flórída.  Þessi bróðir minn hefur ávalt gegnið undir gælunafninu Agú meðal okkar í fjölskyldu hans. Ástæa þess að ég minnis á þetta er að það rifjaðist upp fyrir mér gamalt samtal sem við áttum, líklega í minni fyrstu ferð til hans 1988. Umræðan hafði verið um fátækt og hvað fólk gæti gert í því sambandi og munin á Íslandi og Bandaríkjunum. En hluti þessa samtals gæti hinsvegar allt eins hafa átt sér stað nýlega. Það var eitthvað á þessa leið.

Agú: Skrítið hér í Ameríku lifa nokkrar milljónir manna sem virðast ekki gera sér nokkra grein fyrir því að það býr í Ameríku, Þá er ég að meina svona tækisfærilega séð. Hvaða möguleika það á. Sem er kannski skárra en heima á Íslandi.

Ég: hvað meinarðu?

Agú: Jú sjáðu - Heima á íslandi búa eitthvað um 285 þúsund manns og þeir láta allir eins og þeir búi í Ameríku, án þess að hafa efni á þeirri hugsun. Því það búa ekki milljónir til að borga brúsann heldur innan við 300.000 hræður.

Já magnað þegar maður hugsar um það að við þessar um 300.000 hræður erum líklega að skuldsetja okkur nokkra áratugi fram í tímann. Þó margir haldi að þetta sé eitthvert tækifæri og eitthvað stórkostlegt komi síðar út úr þeirri kreppu sem framundan er held ég að það verði aðeins skuldafen sem við komum til með að lifa í, Atvinnuleysi og hlutfall þeirra sem lifa við fátæktarmörk hækkar. Lausnir þessara mála sem nú er verið að vinna að munu ekki taka vikur eða mánuði. Þær munu taka áratugi með lögsóknum hingað og þangað og milliríkjadeilum ekki aðeins milli Íslands og annara heldur muni fleiri ríki lenda í slæmum málum. Þessi mál munu taka c.a. þessa kynslóð að vinna og greiða úr og við Íslendingar komum til með að verða að greiða milljarði hér og aðra þar.

 

Átti bara að prufa?

Hjá mér vaknar sú spurning hvort Glitnir hafi ekki ætlað sér að athuga hvort ekki væri hægt að redda sér í hvelli á auðveldasta máta þar sem baninn var kominn í tímaþröng og útseð um að málin myndu lagast á alþjóðarmörkuðum næstu daganna?

Dabbi og Seðlabankinn brást hinsvegar við beiðninni með of afgerandi hætti sem ég held að stjórn Glitnis hafi aldrei reiknað með að yrði gert í fyrstu þegar þeir höfðu samband við Seðlabankann. . Eflaust búist við að verða kallaðir á fund og þeir aðstoðaðir á einhvern máta. Seðlabankinn var hinsvegar ekki að eyða tíma í það. Heldur sá Davíð sér leik á borði. Redda bankanum og því að lánadrottnar kæmu höndum yfir bankann og í leiðinni klípa svolítið í erkióvin sinn Jón Ásgeir. Þó allar vættir heims reyni að telja mér trú um að eignarhaldið hafi ekkert haft með ákvörðun Seðlabankans að gera þá trúi ég því aldrei. Hefði einhver annar, þóknanlegur Davíð og flokknum verið í stöðu Jóns hefði aðferðin við þessa aðgerð orðið önnum og líklega útkoman einnig. Þarna var bláa höndin sem þreif til sín í stað þess að rétta.

Get trúað sumu því sem fram kemur í skýrslu Dr. Richard að með þessu beindist athyglin til landsins og ég er líka viss um að þetta kom sér illa fyrir bankakerfið í heild. Í mínum huga kom lán þó aldrei til greina. Þjóðin hefði hreinlega trompast. Spurningin er frekar hefði verið meiri tími til stefnu hefði verið hægt að reyna á einhvern hátt að greiða götur Glitnirs til að nálgast endurfjármögnun á einhvern hátt. Held að þarna hafi menn líklega fallið á tíma með skelfilegum afleiðingum fyrir alla aðila. Þó aðgerðin kæmi sér illa hefði hún orðið enn verri ef ekkert hefði verið gert.

„Fráleitt að Glitnir hefði orðið gjaldþrota"

Ég kalla til ábyrðar

Varla líður sú mínúta þessa daganna að maður lesi ekki um björgunaraðgerðir ríkisstjórna og eða seðlabanka um allan hinn vestræna heim, nema hér upp á íslandi. Hér er engu líkara en Ríkisstjórn og seðlabankastjórar sitji með bundið fyrir augun og haldi fyrir eyrun, ruggi sér fram og aftur og tauti við sjálfa sig - ÞAÐ ER EKKERT AÐ - ÞAÐ ER EKKERT AÐ, ÉG SIT BARA Í STÓLNUM MÍNUM, ÉG SIT BARA KYRR Í STÓLNUM MÍNUM - ÞETTA ER AÐ VERÐA Í LAGI BRÁÐUM. LA-LA-LA-LA...

Þegar þessi staða er komin upp verður að kalla menn til ábyrðar. Því kalla ég hér og nú eftirtalda til ábyrðar

Forráðamenn fyrirtækja að blása EKKI upp vandann með bulli um vöruskort og gjaldeyrishömlur

Fjölmiðla fyrir að birta EKKI hvaða þvælu sem er í von um eftirtekt sem aðeins er til að auka ótta almennings. Heldur fjalla um málefnið með ábyrgum og upplýsandi hætti. Hvetja okkur frekar til samstöðu en sundrungar.

Íslenskar húsmæður til að velja íslenskar vörur fram yfir erlendar  - ALLTAF og FREKAR NÚ EN ELLA

Íslenska kaupmenn fyrir að hækka ekki upp úr öllu valdi þær vörur sem framleiddar eru hér innanlands eins og þær hafi verið keyptar inn fyrir evrur eða dollara. Edurmeta uppstillingu á vörum í verslunum með þetta í huga. Hagnaður ykkar gæti orðið meiri til lengri tíma litið.

Ég geri Bubba Morthens og landsmenn alla ábyrga fyrir góðri samstöðu á Austurvelli á miðvikudaginn 8 október því þar ætlum við að reyna að ná vitrænu sambandi við ráðamenn og seðlabankastjórendur.

Landsmenn geri ég ábyrga með að snúa bökum saman og íhuga hvað hver og einn einstaklingur geti lagt á vogaskálarnar til að vinna okkur út úr þeim vanda sem nú er ríkjandi í samvinnu við aðra landsmenn.

Verð að láta bloggheim vita

Það verður að láta bloggheima vita þegar svo gott tækifæri sem þetta gefst til góðra verka með því einu að sýna pennafærni sína. Því á forsíðu Bubbi.is í dag má sjá eftirfarandi frétt:

"Ertu efni í greinahöfund? Hér gefst færi á að reyna sig við formið því Bubbi.is efnir til samkeppni um grein fyrir liðinn sem við köllum MOLAR.
Eina skilyrðið er að greinin eða sagan fjalli á einhvern hátt um Bubba Morthens, hvort sem hún er sönn eða ósönn.
Uppsetning er að öllu leyti í höndum höfundar. Valið verður úr 3-4 bestu greinunum og þær síðan birtar á Bubbi.is í samvinnu við höfund. Vegleg verðlaun eru í boði.
Það eina sem þú þarft að gera er að setjast niður og byrja að skrifa, senda okkur greinina ásamt nafni, símanúmeri og netfangi, á [e-mail]     fyrir 15. desember 2008."

Samkvæmt mínum bestu heimildum er teljast nokkuð góðar eru þarna bara nokkuð vegleg verðlaun í boði.

 

Auðvelt að verða ríkur

Í frjálsu falli hlutabréfa undanfarnar virku dettur mér í hug sá tími lífs míns þegar mér óvænt áskotnuðust svolitlir peningar. Ég sat og horfði hugsandi á þessa upphæð á innlegsnótunni og sagði við konuna mína að líklega væru bara tveir kostir í stöðunni. Nú hvaða kostir eru það spurði hún. Annað er að reyna að fjárfesta í einhverjum hlutabréfum og gera tilraun til að auka þessa upphæða á þann veg. (þögn) - Já og hinn kosturinn? spurði konan mín.  Já hummm já hann er sá að bara gera það sem ég hef alltaf gert þegar ég hef eignast peninga umfram daglegt líf. Það er að eyða þeim t.d. gætum við skroppið í viku eða tíu daga til New York og lifað eins og greifar fyrir hluta af þessari upphæð. - Já sagði konan mín, þetta eru þínir peningar og ég læt þig alfarið taka ákvörðun um hvað þú vilt gera við þá. - Já, Takk fyrir það svaraði ég og glotti. Næsta dag fór ég og keypti ferð fyrir okkur til New York. Við eyddum þar saman 7 dögum. Tvö ein, út að borða við kertaljós og dýrum stöðum, versluðum það sem okkur datt í hug og einfaldlega áttum saman rómantíska viku sem þó fór að stórum hluta í göngutúra og spjall, hlátur og gleði. Í dag eru þessir dagar, kvöld og nætur í borg alsnægta enn lifandi í huga mínum. Geislandi augnráð konunnar minnar yfir frábærri máltíð miðsvæðis á Manhattan. Göngutúrar eftir strætum heimsboragrinnar og allur sá rómantíski pakki sem fólk getur upplifað í slíkri ferð ef viljinn er fyrir hendi.

Í dag þakka ég mínu sæla fyrir að hafa valið réttan kost í stöðunni. Því enn get ég lokað augunum og séð hamingjusvip konunnar minnar á þessum stundum sem við áttum í borginni. Og enn er þessara daga minnst okkar á milli. Hinn kostunni var eins og ég sagði áðan að kaupa hlutabréf sem væru hvar núna? Já líklega er þetta bara spurning um hvaða mat við leggjum á það að telja okkur rík. Ég veit núna að í þessu tilfelli var fjárfestingin rétt og hagnaðurinn er mér kristaltær alla daga.

Hugleiðing um

Ég nenni ekki að skrifa um handbolta í dag þrátt fyrir að við fengum "bara" silfur á ól.

Aftur á móti tók ég eftir svolítið skrýtinni setningu í kvöld sem ótrúlega margir farþegar mínir notuðu, en það var að þeir þoldu ekki hitt eða þetta. Þegar ég hafði heyrt þetta hjá einum þrem farþegum í röð ákvað ég að gera smá könnu á "Ég þoli ekki" og spyrja viðkomandi nánar út í það sem hann þoldi ekki. Niðurstaðan var auðvitað nokkuð augljós: Vanþekking, það er að viðkomandi hafði myndað sér skoðun án þess að þekkja nokkuð til þess sem hann þoldi ekki. og þessi fullyrðing hafi fæðst vegna einhvers eins atburðar, setningar eða gjörnings.  Í mínum hugarheimum skapast slíkar fullyrðingar af ó-öryggi, minnimáttarkennd og vanþekkingu á því sem ekki er þolað. Setningar eins og Ég þoli ekki útlendinga, ég þoli ekki Bubba Morthens, ég þoli ekki pólitík, ég þoli ekki handbolta, ég þoli ekki... Þar með hefur viðkomandi ekki aðeins komið í veg fyrir að viðkomandi málefni sé rætt í hans viðurvist heldur hefur hann líka útilokað að verða að kynna sér málið og telst því algerlega frjáls frá því sem hann þolir ekki. Eftir situr viðkomandi með skerta þekkingu á málefninu og verður að neyta sér um að kynna sér málið því það er víst óþolandi að vera gripinn við að pæla í pólitík ef maður þolir hana svo ekki.

Já kannski er strúturinn bara lengra kominn í þróun sinni en maðurinn. Hann segir ekki orð heldur stingur bara hausnum í sandinn meðan við hin afneitum mönnum og málefnum í tíma og ótíma. En strúturinn lítur þó upp einhvertíman, meðan við höldum áfram að þola ekki.....

Mér fæddist dóttir

Í nótt aðfararnótt Fimmtudags 21 ágúst 2008 klukkan 4:23 fæddist mér tæplega 12 merkur stúlkubarn. Eftir að hafa í hendisngkasti talið 10 fingur og tíu tær klippti stoltur faðir á naflastrenginn og þetta litla kríli opnaði augun í fyrsta sinn í þessari veröld. Þau virtust nánast tinnusvört og um leið kristaltær og þá var ég þess fullviss að hún væri í lagi og hjarta mitt í auðmýkt þakkaði Guði gjöfina. Það er ekkert sjálfgefið í þessari veröld og ef svona atburður er ekki fegurð lífsins í sinni stærustu mynd þá veit ég ekki hvað það getur verið.

Kannski ein lítil mynd af þessu kríli síðar í dag.

Kjörtímabil?

Þó klukkan sé nú að verða fimm að degi er morgun í mínum skrokk því ég er nývaknaður eftir að hafa ekið fólki heim úr miðbænum í nótt. Og morgunstund gefur gull í mund með ristuð brauði og heimagerðri kæfu.

Ég ákvað tvennt í gær þar sem ég átti afmæli. Það var annarsvegar að reyna að hætta að gagnrýna gagnrýnendur (sjit, hvað það verður erfitt) og hinsvegar hef ég skipt út orðinu KJÖRTÍMABIL í LOFORÐSTÍMABIL sem er gert í viðleitni minni að minna kjörna fulltrúa mína bæði á þingi og ekki síður í Borgarráði á að efna loforð sín við kjósendur frekar en þeir séu þarna kjörnir til að sitja á rassgatinu og máta hvern stólinn á fætur öðrum í von um að borgarstjórastóllinn eða ráðherrastóllinn verði þeirra og rétta svo við og við upp hönd til að samþykkja eitthvað ef það bara hentar þeim. Mín áskorun er að þeir fari nú að hætta pólitískum skollakeikjum og framaplotti og snúi sér að þeim málefnum sem bíða úrlausnar fyrir þegna landsins.

Atvinnulausir Borgarstjórar

Æi ég verð aðeins að blogga um þessa vitleysi sem Borgarmálin eru orðin. Því ég var að gera mér grein fyrir því að þegar að atvinnuöryggi kemur sem oft verður í upplausn þegar að kreppir í samfélaginu er það líklega hvað mest meðal Borgarstjóra. Hér á landi er aðeins einn maður í einu Borgarstjóri og ef litið er sex ár aftur í tímann eru sex borgarstjórar nú án Borgar til að stjórna og því atvinnulausir í þeim skilningi. Spurning hvor við verðum ekki bara að fara að reisa fleiri Borgir hér á skerinu til að sporna við ástandinu. Þó ekki væri nema Skýjaborgir...

Allt um þungun Hrafnhildar?

Æi, ekki nenni ég að fara að blogga hér um borgarmálin sem hafa dunið á mér í allan dag úr öllum útvarpstækjum sem á vegi mínum hafa orðið. Aftur á móti verð ég að fara út í búð og kaupa séð og heyrt. Samkvæmt því sem DV segir frá  13 ágúst eru Séð og heyrt nefnilega að breyta áherslum sínum verulega svo ekki sé meira sagt.  En DV segir svo:

.. Bubbi Morthens og eiginkona hans Hrafnhildur Hafsteinsdóttir eiga von á barni á útmánuðum næsta árs. Greint verður frá þessu í Séð & Heyrt sem dreift er í verslanir á morgun. Í blaðinu er ítarlega fjallað um þungunina....

Ég er svona að spá í hvernig blaðið ætlar að fjalla ítarlega um þungun án samstarfs við Hrafnhildi. Ætli þetta verði á fræðilegum grunni...

Ég er nefnilega mikill áhugamaður um þetta efni þessa dagana enda spurning hvort ég fái dóttur í afmælisgjöf á morgun því konan er nánast komin að því fæða okkar þriðju dóttur. Reyndar ætlaði ég nú að fjalla ítarlegar um þetta allt en ég held ég bregði mér nú í næstu sjoppu og kaupa blaðið og lesa þessa ítarlegu umfjöllun um þungun (sem þó hefur hvergi verið staðfest) Þetta kallar maður sko RANNSÓKNARBLAÐAMENNSKU. En ég segi ekki meir fyrr en ég er búinn að lesa déskollans blaðið