Flestar vikur 2010-2012

Það er hægt að skoða Tónlistann á margvíslegan hátt. t.d. hvaða tónlistarmaður hefur setið þar lengst í heild, eða tiltekinn tíma (þá undir eigin nafni) Til gamans langaðu mig að vita hvaða aðili væri að gera það best á þeim áratug sem nú er að líða. Því þar höfum við þrjú ár samkvæmt okkar uppsetningu, það er árin  2010, 2011 og það sem af er 2012. Niðurstöðurnar komu ekki á óvart.

 

Helgi Björns hefur verið að gera frábæra hluti með Reiðmönnum vindanna. Plötur þeirra ásamt hans eigin hafa setið lengst allra á topp 30 þessi ár eða samtals 191 viku.

 

Sigur Rós situr í 2. sæti og munar þar mestu um tvær plötur ; Ágætis byrjun, sem samtals hefur setið í 170 vikur á topp 30 frá því hún kom fyrst út og er líklega í öðru sæti yfir plötur sem setið hafa flestar vikur á lista í sögu Tónlistans. Sigur Rós á einnig aðra plötu sem gerir það gott og er komin með samtals yfir 100 vikur á topp 30 frá því hún kom fyrst út. Það er platan Með suð í eyrunum við spilum endalaust. Þessar tvær plötur eru megin uppistaðan í því að koma sveitinni í 2. sæti yfir þá sem eiga flestar vikur á listanum þessi rúmlega  tvö og hálft ár sem tekin voru saman.

 

Björk situr í þriðja sætinu og þar munar mestu um Gling-Gló sem er galdur hvað sölu varðar ár eftir ár.  En auk hennar er það platan Biophilia sem er með hátt í 30 vikur.

 

Dikta situr í fjórða sætinu og þar er það plata sveitarinnar; Get It Together, sem setið hefur vel yfir 80 vikur samtals á listanum. Hjálmar rekur svo lestina í þessu Topp fimm á hver setið hefur lengst á lista þessi ár.

 

Hafa skal í huga að öll þessu tónlistarnöfn eru enn starfandi og eru enn að setja mark sitt á listann svo þetta er í raun fljótt að breytast.

 

Nafn með lengstu setu á topp 30 tímabilið: 2010-2012

    1. Helgi Björnsson: 191. vika, 6. plötur

    2. Sigur Rós: 107. vikur, 7. plötur

    3. Björk Guðmundsdóttir: 102. vikur, 4. plötur

    4. Dikta: 96. vikur, 3. plötur

    5. Hjálmar: 83. vikur, 3. plötur

Plötur ársins 1981

Líkt og í fyrri umfjöllun er þeim plötum gefin stig eftir setu á lista DV yfir mest seldu plötur landsins. Fyrir 1. sætið fær platan 10 stig, fyrir 2. sætið 9 stig og svo koll af kolli. Hér er komið að árinu 1981.. Samtals 107 plötuheiti fór inn á Topp tíu árið 1981, sem er að vísu ekki nema sjö plötum fleiri en árinu áður

 

Eins og sjá má trónir Dr. Hook efst á toppnum með þessa klassísku safnplötu. Platan sem reyndar hafði komið út 1980 innihélt m.a. lagið Sylvia's Mother sem enn í dag er með mest leiknu lögum sveitarinnar. Platan sat heilar 6. vikur í 1. sæti listans yfir söluhæstu  plöturnar og ekki ólíklegt að umrætt lag hafi þar átt sinn þátt í því en sveitin á þó talsverðan slatta af grípandi Counry-rokki sem gengu í fjölmarga takthausa. Stars On 45 æði gekk yfir landiann um þetta leiti mörgum til skelfingar.

 

Vinsælustu plötunar 1981 samkvæmt Vinsældalista DV (vika 1-52)

  1. Greatest Hits – Dr. Hook (13. vikur, 107 stig)

  2. Stars On 45 – Star Sound (12. vikur, 101 stig)

  3. Double Fantasy – John Lennon og Yoko Ono (18. vikur, 97. stig)

  4. Bully For You – B.A. Robertson (11. vikur,  86. stig)

  5. Tónar um ástina – Richard Clayderman (16. vikur, 83. stig)

  6. Hi Infidelity – REO Speedwagon (14. vikur, 82. stig)

  7. Himinn og jörð – Gunnar Þórðarson (9. vikur, 80. stig)

  8. Journey To Glory – Spandau Ballet (12. vikur, 80. stig)

  9. Sumargleðin syngur – Sumargleðin (10. vikur, 75. stig)

  10. Deió – Laddi (10. vikur, 74. stig)

 

Frá upphafi listans 12.6.1978 - 3.1.1982

  1. Haraldur í Skrýplalandi - Skrýplarnir (25. vikur, 187. stig)

  2. Ljúfa líf – Þú og ég (18. vikur, 160. stig)

  3. Glass House – Billy Joel (17. vikur, 143. stig)

  4. Grease – Ýmsir (27. vikur, 138. stig)

  5. Discovery – Electric Light Orchestra (20. vikur, 132. stig)

  6. Bat Out Of Hell – Meat Loaf (15. vikur, 130. stig)

  7. Double Fantasy – John Lennon og Yoko Ono ( 18. vikur, 129. stig)

  8. The Wall – Pink Floyd (21. vika, 128. stig)

  9. Star Party – Ýmsir (15. vikur, 123. stig)

  10. Best Disco Album – Ýmsir (13. vikur, 118. stig)

Plötur ársins 1980

Það er komið að því að skoða hvað plötur skoruðu hæst árið 1980. En eins og áður er hér um að ræða stigagjöf til þeirra platna sem sátu á vinsældalista Dagblaðsins og Vísis og síðar DV. Þetta var fyrir daga Tónlistans eins og við þekkjum hann nú, en sömu aðferðum var þó beitt við að finna söluhæstu plöturnar. Það er að stærstu söluaðilar landsins gáfu upp mest seldu plötur vikunnar. Við að finna út hvað plötur hafi notið mestra vinsælda er 1. sæti listans gefin 10 sig, 2. sætið fær 9 stig og svo koll af koll uns platan í 10 sætinu fær 1. stig. í hverri viku og síðan er þetta lagt saman. Innan svigans eru heildar vikufjöldi plötunnar og stigin samkvæmt ofangreindri aðferð.

Billy Joel situr á toppnum og það vekur athygli að kántrýboltinn Kenny Rogers á tvær plötur á listanum, enda naut hann mikilla vinsælda hér á þessum árum sem og vestanhafs.

Vinsælustu plöturnar á árinu 1980 (Vika 1 – 53)

  1. Glass House – Billy Joel (17. vikur, 143. stig)

  2. Cornerstone – Styx (16. vikur, 110. stig)

  3. Meira salt – Áhöfnin á Halastjörnunni 15. vikur, 110. stig)

  4. Kenny – Kenny Rogers (17. vikur, 97 stig)

  5. The Wall – Pink Floyd (21. vika, 95 stig)

  6. Against The Wind – Bob Seger (16. vikur, 89. stig)

  7. Initial Sucess – B.A. Robertson (14. vikur, 88. stig)

  8. Single Album – Kenny Rogers (13. vikur, 86. stig)

  9 The Game – Queen (14. vikur, 75. stig)

10. Good Morning America – Ýmsir (9. vikur, 75 stig)

Frá upphafi listans 12.6.1978 - 4.1.1981

  1. Haraldur í Skrýplalandi - Skrýplarnir (25. vikur, 187. stig)

  2. Ljúfa líf – Þú og ég (18. vikur, 160. stig)

  3. Glass House – Billy Joel (17. vikur, 143. stig)

  4. Grease – Ýmsir (27. vikur, 138. stig)

  5. Discovery – Electric Light Orchestra (20. vikur, 132. stig)

  6. Bat Out Of Hell – Meat Loaf (15. vikur, 130. stig)

  7. The Wall – Pink Floyd (21. vika, 128. stig)

  8. Star Party – Ýmsir (15. vikur, 123. stig)

  8. Best Disco Album – Ýmsir (13. vikur, 118. stig)

  10. String Of Hits – Shadows (16. vikur, 114 stig)

Plötur ársins 1979

Við höldum áfram að fara í gegnum þær plötur sem sett hafa mark sitt á Tónlistann í gegnum árin sem reyndar hét á þessum árum Vinsældarlisti Vísis og síðar vinsældarlisti DV eftir sameininguna. Nú er það fyrsta heila árið það er 1979, sem fyrr gefum við plötunni í 1. sæti 10 stig, plötunni í 2. sæti 9. stig og svo koll  af kolli. (innan svigans sést hve lengi platan sat á topp 10 og stigin samkvæmt ofangreindri formúu)

Haraldur í Skrýplalandi kemur um mitt árið með þessa einstöku plötu, fyrr um vorið hafði komið út einskonar undanfari, 45 sn. plata með fjórum lögum sem ekki voru að finna á þessari plötu. En óhætt er að segja að markaðsetningin hafi tekist vel því efnt var til sérstaks Skrýpladags daginn sem platan kom út og vakti talsverða athygli. Þess má og geta að upprunalega útgáfa plötunnar hefur aldrei komið út á CD (því miður).

Topp 10 árið 1979 lítur þá svona út frá 1. vikur 1979 – 52 vikur 1979

   1. Haraldur í Skrýplalandi – Skrýplarnir  (25. vikur, 187. stig)

   2. Discovery – Electric Light Orchestra (20. vikur, 132. stig)

   3. Best Disco Album – Ýmsir  (13. vikur, 118. stig)

   4. Spirits Having Flown  - Bee Gees (15. vikur, 112. stig)

   5. Ljúfa líf – Þú og ég (10. vikur, 94 stig)

   6. Oceans of Fantasy – Bonnie M. (10. vikur, 86. stig)

   7. Í góðu lagi – HLH-flokkurinn (10. vikur, 85. stig)

   8. War Of The Worlds – Jeff Wayne (12. vikur, 85. stig)

   9. Brottför kl. 8 – Mannakorn (12. vikur, 76. stig)

   10. Breakfast America – Supertramp (19. vikur, 73. stig)

 

Frá upphafi (18.06.1978 – 30.12.1979)

  1. Haraldur í Skrýplalandi – Skrýplarnir (25. vikur, 187. stig)

  2. Grease – Ýmsir (27. vikur, 138. stig)

  3. Discovery – Electric Light Orchestra (20. vikur 132. stig)

  4. Bat Out Of Hell – Meat Loaf (15. vikur, 130. stig)

  5. Star Party – Ýmsir (15. vikur, 123. stig)

  6. Best Disco Album – Ýmsir (13. vikur, 118. stig)

  7. Spirits Having Flown – Bee Gees (15. vikur, 112. stig)

  8. 52nd Street – Billy Joel (17. vikur, 109. stig)

  9. Ljúfa líf – Þú og ég (10. vikur,  94. stig)

  10. Ég syng fyrir þig – Björgvin Halldórsson (14. vikur, 90. stig)

Þegar útvarpið og hljómplatan...

Það er gömul saga og ný að ein tækniuppfinningin hafi áhrif á aðrar sem á undan komu. Nú tala menn mest um andlát hefðbundinnar útgáfu á geisladiskum. En þetta er ekki ný saga. Kíkjum í útvarpstíðindi frá 1942 og þar er skrifað:

,,Útvarp og grammófónn hafa orðið þess valdandi, að mikið hefur dregið úr tónlistariðkun í heimahúsum. Sem dæmi má nefna að árið 1926 voru 130 „prívat  músík-klúbbar“ starfandi í Danmörku, en 10 árum seinna var tala þeirra komin niður í 8. Í Bandaríkjunum voru árið 1909 seld 230 þúsund píanó en árið 1929 seldust aðeins 92 þúsund.

Að sögn mun þetta hafa breyst til batnaðar hin síðustu ár, og sjálfsagt lagast þetta með betri og hóflegri notkun úrvarpsins, þ.e.a.s. þegar mönnum lærist að nota útvarpið eins og vatnið og skrúfa ekki frá nema þegar þá langar til að hlusta, stilla tækið vandlega, ekki of hátt, og hlusta með athygli.

  Útvarpið er sérstaklega mikilvægt okkur Íslendingum sökum fámennis og eingangrunar. Gera má ráð  fyrir, að allir þorri landsmanna eigi ekki kost á að hlýða á aðra tónlist en þá, sem útvarpið flytur.
Þess vegna verður að vanda vel til útvarpstónlistarinnar og kappkosta að fá hina frægustu menn til að annast tónlistarflutning frá útvarpssal; en hinsvegar mætti draga úr því flóði af „skrallmúsík“ sem dembt er yfir hlustendur í tíma og ótíma. Einnig mætti hverfa sú óhæfa að fylla út í eyður dagskrárinnar með því að leika hluta af lögum af tónplötum að ógleymdum gömlum og útslitnum hljómplötum, sem oft heyrast í útvarpinu og verka eins og svívirða um höfunda og hlustendur."

Útvarpstíðindi 4-5 tbl, 5. árgangur 7.desember 1942

Og undarlegt að mér finnst eitthvað hafi ekki breyst hvað seinni hluta þessarar greinar varðar.

Björk Guðmundsdóttir - Þetta ber okkur hinum að virða

Það er áhugavert að skoða árangur Bjarkar Guðmundsdóttur á Breska vinsældarlistanum. Sama hvað mönnum kann að þykja um tónlist hennar verður ekki fram hjá því litið að hún er og verður um nánustu framtíð okkar stæðsta stjarna á alþjóðarvettfangi.

Ég ber ótakmarkaða virðingu fyrir henni sem listamanni. Enda er ferill hennar einstakur. Listamaður sem farið hefur sínar eigin leiðir án þess að láta glepjast af markaðslögmálunum. m.ö.o tekið list sína fram yfir og náð árangri.
 
Saga Bjarkar á Breska listanum er:

Björk kemst fyrst inn á Breska listann 19. júní 1993
Fjöldi platna sem farið hefur inn á listann: 30
 - þar af Smáskífur: 20
 - þar af Breiðskífur: 10
 
Þær hafa setið samtals 208 vikur á lista
Hæðst hefur plata með henni náð: 2. sæti

  .

Samtals á topp 10: smáskífur: 3
Samtals á topp 10: Breiðskífur: 6

  .

Samtals á topp 40: smáskífur: 19
Samtals á topp 40: Breiðskífur: 8

Flugan sem flogið hefur í 60 ár

Flugum er ekki skammtaður langur líftími. Undantekning frá þessu er „Litla flugan“ hans Fúsa. Sú litla fluga hefur verið sem eyrnakonfekt okkar Íslendinga í 60 ár.

   

Það var í ársbyrjun 1952 sem Sigfús kom fram í þætti Péturs Péturssonar „Sitt af hvoru tagi“ í Ríkisútvarpinu og söng þar nýtt lag Litla flugan. Textinn við lag Sigfúsar var eftir Sigurð Elíasson. Og með þeim flutningi flaug Litla flugan af stað, því lagið varð fleygt á sömu stundu.

   

Svo vel var því tekið að um það var skrifað og skrafað næstu mánuði í dagblöðum landsmanna.

   

Í Morgunblaðinu 25. febrúar 1952 er skrifað :

„Það var sannarlega ánæjulegt að heyra Sigfús Halldórsson í þætti Péturs Péturssonar „Sitt af hvoru tagi.“ Nýja lagið hans Sigfúsar, „Litla flugan“ er nú raulað víða á skemmtistöðum bæjarins. Það væri sannarlega gaman að heyra oftar í Sigfúsi....“

   

Og meira  úr sama blaði frá í mars 1952:

Í hverri götu suðar hún „Litla flugan“ hans Sigfúsar Halldórssonar, þessi sem hann kom með að vestan í vetur.

Strákarnir blístra lagið undir berum himni, húsmæður raula það við eldhúsborðið, og barnfóstran syngur hvítvoðunginn í svefn.

Þetta er ekki í fyrsta sinn sem þessi vinsæli dægurlagahöfundur vinnur hvers manns hug og hjarta. Þótti á sínum tíma mörgum keyra úr hófi dálætið á Tondeleyó, og enn lifir sumstaðar í þeim gömlu glæðum.

   

Líklega varð Björn R Einarsson fyrstur til að hljóðrita lagið er hann söng það fjórraddað inn á plötu hjá Ríkisútvarpinu fyrri hluta árs 1952. Þessi upptaka var spiluð í nokkur skipti en líftími slíkra platna hjá útvarpinu á þessum tíma var ekki langur.

  

Og til að hljóðfæraleikarar færu nú ekki að slá feilnótur var lagið gefið út á nótum og auglýsingarnar birtar í öllum dagblöðum 15. mars 1952

   

  - Og það voru fleiri en Íslendingar sem heillast

6. maí var frumsýnd revían Sumareyjan í Sjálfstæðishúsinu á vegum Bláu Stjörnunni. Vegna þess verks komu hingað erlendir listamenn sem tóku þátt í þessari uppfærslu. Einn þeirra var Lulu Ziegler nokkuð þekkt dönsk revíuleikkona sem tók sig til, æfði lagið og söng það á Íslensku við undirleik Carl Billich þetta kvöld.

   

Sigfús sjálfur nýtti sér vinsældirnar og í samvinnu við Soffíu Karlsdóttur og leikarann Höskuld Skagfjörð ferðuðust þau saman um landið þvert og endilangt frá júlí og fram í október 1952 undir heitinu Litla flugan. Sigfús lék á píanóið og söng og Soffía söng einnig en Höskuldur las upp úr Sölku Völku, Halldós Laxness. Og þegar hópurinn loks kom til Reykjavíkur og kom fram þar voru 54 sýningar að baki á 40 stöðum á landinu.

   

 - Flugan flýgur til útlanda

En þó vetur gengi í garð lifði flugan hans fúsa því Í desember brá Sigfús sér til Danmerkur og Noregs og ástæðan var að erlendir listamenn vildu hljóðrita Litlu fluguna og fleiri lög Sigfúsar og gerðu það. Sigfús lék lagið einnig inn fyrir danska útvarpið.

    

 - Og svo flaug flugan á plast

En í árslok 1952 kom Litla flugan út á plötu í flutningi höfundar á merki Íslenskra tóna. Og að er staðreynd að ekkert lag naut jafnmikillar vinsælda árið 1952 og Litla flugan hans Fúsa þó menn gætu ekki eignast það á plötu fyrr en í árslok (og reyndar eru skiptar skoðanir á því hvort platan með lögunum hafi borist hingað fyrr en í ársbyrjun 1953.) Reyndar varð að panta annað upplag plötunnar strax í ársbyrjun því platan með Litlu flugunni hafði flogið út og var fullyrt að aldrei áður hafði ein hljómplata hér á landi selst svo hratt upp.

 

  - Litla flugan

Lag eftir Sigfús Halldórsson / ljóð Sigurður Elíasson

Lækur tifar létt um máða steina.

Lítil fjóla grær við skriðu fót.

Bláskel liggur brotin milli hleina.

Í bænum hvílir íturvaxin snót.

Ef ég væri orðin lítil fluga,

ég inn um gluggann þreytti flugið mitt,

og þó ég ei til annars mætti duga

ég eflaust gæti kítlað nefið þitt.                 

   ..

Þessu varð hin íturvaxna snót að svara og það gerði hún um mitt ár.

   

  - Til Fúsa

Ég legg mig oft og læt mig um þig dreyma

í litla bænum allt er kyrrt og hljótt.

Myndir af þér minningarnar geyma,

ég man þær, finn þær allar hverja nótt.

Ef ég ætla að sofna sætt á daginn,

er sífellt fluga að kítla nefið mitt.

Ég stekk á fætur, flý um allan bæinn,

en flugan syngur látlaust nafnið þitt

Fúsim Fúsi, Fúsi

íturvaxin snót.

   

Lagið mitt í ár verður Litla flugan 

"Guð gaf okkur sjö daga"

Það þótti talsverður viðburður þegar rokkarnir í The Stranglers heimsóttu skerið 1978. Lífið var með örlitlu öðru sniði í þá daga en nú er.

Það var ein útvarpsstöð, ein sjónvarpsstöð sem fór í frí eitt kvöld í viku og mánuð af sumri. Ætluðu menn til útlanda urðu þeir að fylla út þar til gerðar skýrslur til að fá afgreiddan gjaldeyrir (reyndar líkt og nú er).
Kornflexið kostaði mikið minna en Cheriosið.

Hér var enginn bjórinn

Vínveitingarhús lokuð á miðvikudögum

Já lífið var öðruvísi á Íslandi í þá daga en nú er.

 

Stranglers komu til landsins og haldinn var sögulegur kynningar og blaðamannafundur í Hljóðrita í Hafnarfirði. Meðlimir sveitarinnar voru ekki alveg að nenna að standa í þessu. Íslensku blaðamennirnir óframfærnir og feimnir en reyndu þó að rabba við gestina. og frá því er sagt í Vísir. Hér segir blaðamaður Vísis frá samskiptum sínum við Jet Black trommuleikara

 

„Eins og yfirleitt þegar Íslendingar ræða við erlenda gesti bar bjórinn á góma. Black sagðist vorkenna okkur af öllu hjarta. Og við lá að honum vöknaði þegar honum var sagt frá að vínveitingahúsum væri lokað á miðvikudögum. Hann var þá spurður hvort ekki væri nóg að drekka sex daga vikunnar? ..Guð gaf okkur sjö daga til að drekka sagði hann og spurði hvað Íslendingar gerðu eiginlega á miðvikudögum! Makalaus þjóð þetta í skrítnu landi“

(frásögn í Vísi um blaðamannafuld í Hljóðrita með The Stranglers 1978)

Hvar var Trúbrot?

Í bók Dr. Gunna "Eru ekki allir í stuði" sem að mörgu leyti er hið besta rit má finna samt eitt og annað undarlegt. Þar segir í kaflanum um Trúbrot

„Magnús Kjartansson úr Júdasi kom í staðin fyrir Karl, en miklar vangaveltur höfðu staðið um hvaða söngkona gæti tekið við  af Shady. Á tímabili var talað um að Björgvin Halldórsson yrði vélaður yfir, en hann var í góðum málum með Ævintýri og lét ekki freistast. Því varð úr að Trúbrot hélt áfram sem kvartett og var fyrsta verkefnið að leika 20 mínútna verk eftir Leif Þórarinsson á Listahátíð. Verkið hét „Brot-trú-brot og var flutt einu sinni í Norræna húsinu“

tilvitnun lýkur!

Þetta átti að eiga sér stað 21. júní 1970. En hvað gerðist þennan dag. Hver var staða Trúbrots 21. júní 1970.  Og hvernig var sveitin skipuð þarna.

Fyrir lá að koma fram á listahátíð eins og bók Dr. Gunna segir. En sveitin var og auglýst í Glaumbæ þá um kvöldið. Byrjum þar, í Glaumbæ.

21. júní 1970: lék sveitin í Glaumbæ og var það í síðasta sinn sem hljómsveitin Trúbrot kemur fram í  sinni upphaflegu mynd eins og hún var skipuð ári áður. Því Karl Sighvatsson var að hverfa á brott og í hans stað var áætluð koma Magnúsar Kjartanssonar í sveitina. Kalli var því að spila með þeim í Glaumbæ þetta kvöld í síðasta sinn. Annar meðlimur sveitarinnar var einnig að stíga á stokk með Trúbrot í síðasta sinn þetta kvöld en það var söngkonan Shady Owens. Sem hafði ákveðið að sega skilið við Trúbrot. Meðal gesta þetta kvöld voru meðlimir Led Zeppelin. Sem vöktu talsverða athygli en strax eftir að Trúbrot hóf leik gleymdust þeir gestir algerlega og ekki langt liðið á ballið þegar erlendu stórstjörnurnar yfirgáfu svæðið enda gersigraðir af Trúbrot um hylli gesta.

Spólum þennan dag og klukkan er 2 og tónleikarnir í Norræna húsinu byrja. Fyrirhuguð voru nokkur klassísk verk á þessum tónleikum ásamt umtöluðu verki Trúbrots.

Ég var ekki þar, ég er líka næstum viss að Dr. Gunni var heldur ekki í húsinu, en var Trúbrot í húsinu. Ég veit það ekki. En ég veit að blaðamaður Alþýðublaðsins var þarna því hann skrifar heilsíðu um þessa tónleika í blaði sínu 23. júní. (bls 3.) undir fyrirsögninni „Frá Setningu Listahátíðar“ í niðurlagi umfjöllunar af tónleikunum í Norræna Húsinu segir hann

 „Niður féll flutningur verks Leifs Þorarinssonar fyrir bítlahljómsveitina Trúbrot og blásarakvintett. Hefur mörgum vafalaust þótt það slæmt því að sannarlega eru þar forvitnileg tengsl á ferð“

Stóra spurningin er því: Hvar var Trúbrot?  Svo veit ég ekki hvort sveitin muni það nokkuð sjálf?. 

Saga úr poppinu - Haukar - Þrjú tonn af sandi

Þegar hljómsveitin Haukar ákvað að taka upp plötu var ekkert verið að velta hlutunum of mikið fyrir sér. Pöntuðu bara 20 upptökutíma í Hljóðrita í Hafnarfirði. Þegar þeir mættu á staðinn 30. maí 1975 gætti nokkurs óstyrks því aðeins tveir meðlima sveitarinnar höfðu áður stígið inn í hljóðver, þeir Gunnlaugur Melsteð, söngvari og hljómborðsleikarinn Kristján Guðmundsson, sem sjaldnast var kallaður annað en Kiddi. En þeir höfðu þeir tekið þátt í gerð plötu Ómars Óskarssonar Middle Class Man í Lundúnum árinu áður.

Sveitin náði að taka upp grunna beggja laganna þennan dag undir stjórn Engilberts Jensen en Jón Þór stjórnaði tökkunum á upptökuborðinu. Á B-hlið skífunnar var rólegt og huggulegt lag eftir Kidda Let's Start Again en A-hliðina prýddi lag sem sjálfur konungur rokksins Elvis Presley hafði sungið Return To Sender en hér var það komið með íslenskt heiti "Þrjú tonn af sandi" og  alíslenskann texta eftir Þorstein Eggersson.

Sveitin hafði ekki en leitt hugann að því hvernig koma mætti þessu út því þeir höfðu hreinlega ekki pælt í því. Var ákveðið þarna á staðnum að hringja í þann útefenda sem þeim leist hvað best á og ekki ólíklegt að Engilbert Jensen hafi gefið þeim upp númerið hjá Rúnar Júlíussini Hljómamanni og þá einnig framkvæmdarstjóra útgáfunnar Hljómar. Hann mætti svo þegar líða tók á daginn, hlustaði á piltana taka upp og spjallaði við þá og aðra á staðnum. „Gott swing í þessu hjá ykkur“ var yfirlýsing framkvæmdarstjórans áður en hann yfir gaf staðinn. Næsta dag hafði Rúnar svo ákveðið sig hringdi í söngvarann og sagði „Jú auðvitað gefur maður þetta út. Þetta er prýðilegt“ og þar með var útgefandinn að fyrstu plötu Hauka fundinn.

Sveitin mætti svo aftur í hljóðverið þriðjudaginn 3. maí þar sem lögin voru sungin inn og bætt við þeim hljóðfærum sem þurfa þótti. Það var öllu léttara yfir mannskapnum það kvöld, sopið á rauðvínu og pílum kastað í píluspjald starðarins meðan unnið var í tæknimálum laganna tveggja.

Platan kom svo út strax að lokinni verslunarmannahelgi þetta sama ár eða 6. ágúst 1975.  Þrátt fyrir að fá misdóða dóma gagnrýnenda sló lagið um Andrés sem fékk nóg mótatimbur í gegn og er enn sungið hástöfum í partýum um allt land. Enda Haukar annáluð gleði, partý og stuðsveit.